Maafisa wa Nigeria wameripoti kuwa mashambulizi kadhaa ya kigaidi katika Jimbo la Borno yamesababisha vifo vya watu 18 na wengine 42 kujeruhiwa.
Katika hali ambayo machafuko yanaendelea nchini Nigeria na baadhi ya nchi jirani kutokana na harakati za kundi la kigaidi la Boko Haram, mashambulizi ya kujitoa muhanga katika jimbo la Borno yamesababisha makumi ya watu kuuawa na wengine kujeruhiwa.
Shirika la Kudhibiti Migogoro la Jimbo la Borno nchini Nigeria liliripoti kuwa takriban watu 18 waliuawa na wengine 42 kujeruhiwa kutokana na mfululizo wa mashambulizi ya kigaidi katika jimbo hilo Jumamosi (jana). 19 kati ya waliojeruhiwa wako katika hali mbaya.
Katika mojawapo ya mashambulizi haya, mwanamke aliyejitoa mhanga alilenga sherehe ya harusi katika mji wa Gevoza akiwa amembeba mtoto.
Shambulio lingine la kigaidi lilitokea katika hospitali ya mji huo huo, ambao ni mji wa mpakani wa Nigeria na Cameroon, ambapo wahasiriwa wa shambulio la kujitoa mhanga kwenye sherehe ya harusi walihamishwa.
Barkindo Saido, mkuu wa Wakala wa Kudhibiti Mgogoro wa Jimbo la Borno, alitangaza kwamba wahasiriwa wa mashambulio ya kigaidi ni pamoja na “watoto, wanaume, wanawake na wajawazito”.
Ingawa hakuna kundi lililodai kuhusika na mashambulizi hayo ya kigaidi, baadhi ya watu wanaona Boko Haram kuhusika.
Mnamo mwaka wa 2014, Boko Haram walichukua udhibiti wa mji wa Gwoza, lakini mnamo 2015, jeshi la Nigeria, kwa msaada wa jeshi la Chad, liliweza kuuteka tena. Kundi hili la kigaidi lina historia ya mashambulizi ya kigaidi, utekaji nyara wanawake na wasichana wa shule.
Ghasia kati ya kundi hili na jeshi la Nigeria zimesababisha vifo vya zaidi ya watu 40,000 na milioni mbili bila makazi katika miaka ya hivi karibuni.
Machafuko ya Nigeria yalienea hadi Niger, Cameroon na Chad, na hii ilisababisha kuundwa kwa muungano wa nchi za Afrika kushughulikia suala hilo.
