Ikulu ya Russia imetangaza habari ya kufanyika mazungumzo ya simu baina ya Rais Vladimir Putin wa nchi hiyo na Kansela wa Ujerumani, Olaf Scholz ambapo Putin amesema kuwa nchi yake iko tayari kuanzisha mazungumzo ya kusimamisha vita nchini Ukraine.
Kwa mujibu wa shirika la habari la TASS la Russia, rais wa nchi hiyo na kansela wa Ujerumani wamefanya mazungumzo ya kwanza ya simu baada ya miaka miwili ya kutokuweko mazungumzo yoyote baina yao na pande mbili zimezungumzia pia suala la Asia Magharibi hasa vita baina ya utawala wa Kizayuni dhidi ya Ghaza na Lebanon.
Wakati huo huo serikali ya Ukraine imesema kuhusu mazungumzo ya simu baina ya Rais Vladimir Putin wa Russia na kansela wa Ujerumani, Olaf Scholz, kwamba mazungumzo hayo ni ya kuinufaisha Russia na hayana faida yoyote kwa Ukraine.
Serikali ya Kyiv imedai kuwa mazungumzo baina ya viongozi hao wakuu wa Russia na Ujerumani hayakuja na kitu kipya na hayakusaidia chochote katika utatuzi wa mgogoro wa Ukraine.
