Tel Aviv iliiomba Mahakama ya Hague kukataa ombi jipya la #Afrika_Kusini la kutoa amri ya dharura kuhusu operesheni ya jeshi la #Israeli huko #Rafah.
Katika nyaraka zilizochapishwa hivi majuzi na Mahakama ya Kimataifa ya Haki, Israel imesema kuwa hukumu ya awali iliyotolewa na mahakama hii inajumuisha “hali ya jumla ya uhasama huko Gaza” na kwa hivyo ombi hilo jipya la Afrika Kusini linapaswa kukataliwa.
Israel ilitangaza wiki chache zilizopita kuwa inapanga kupanua shughuli zake za ardhini hadi katika mji wa Rafah. Uamuzi huu umezua wasiwasi mkubwa miongoni mwa wanaharakati wa haki za binadamu, ambao wanasema kuwa zaidi ya watu milioni moja tayari wametafuta hifadhi Rafah ili kuepuka matokeo ya vita vya #Gaza.
Jumanne ya wiki hii, Afrika Kusini ilipinga Israel kwa mara ya pili katika Mahakama ya Hague kuhusu operesheni hiyo huko Gaza. Afrika Kusini iliitaka mahakama kuzingatia utoaji wa hatua mpya za dharura za kuwalinda Wapalestina kwa kuzingatia nia ya Israel ya kupanua operesheni zake za kijeshi hadi katika mji wenye msongamano wa watu wa Rafah.
Mwezi uliopita, Mahakama ya Kimataifa ya Haki iliiamuru Israel kuchukua hatua zote zinazohitajika kuzuia mauaji ya kimbari dhidi ya Wapalestina katika Ukanda wa Gaza.
Israel imekanusha tuhuma zote za mauaji ya halaiki huko Gaza na kuitaka Mahakama ya The Hague kukataa haraka malalamiko ya Afrika Kusini.
Ofisi ya Rais wa Afrika Kusini ilitangaza katika taarifa yake siku ya Jumanne: “Katika ombi hilo lililowasilishwa mahakamani hapo jana, serikali ya Afrika Kusini ilieleza vikali wasiwasi wake kwamba operesheni ya kijeshi isiyo na kifani ya Israel huko Rafah tayari imesababisha mauaji ya watu wengi.” Operesheni hii itasababisha mauaji, majeraha na uharibifu mkubwa zaidi.”
