Kiwewe cha nchi za Ulaya kwa nafasi ya kudhamini usalama ya Jeshi la Walinzi wa Mapinduzi ya Kiislamu

Waziri wa Mambo ya Nje wa Iran Hossein Amir-Abdollahian amesema katika mazungumzo ya simu aliyofanya na mwenzake wa Uswisi Tobias Billström kwamba, nchi za Ulaya zina deni la malipo ya shukrani kwa juhudi kubwa za Jeshi la Walinzi wa Mapinduzi ya Kiislamu katika kupambana na ugaidi na akabainisha kwamba: Jeshi la Walinzi wa Mapinduzi ya Kiislamu (IRGC) liliiokoa miji mikuu ya Ulaya na mashambulizi ya DAESH (ISIS).

Katika muendelezo wa hatua zake za karibuni dhidi ya Iran na misimamo yake ya kuingilia masuala ya ndani ya Iran, Bunge la Ulaya, siku ya Alkhamisi ya tarehe 19 Januari lilipitisha mpango dhidi ya Iran na kutaka jina la Jeshi la Walinzi wa Mapinduzi ya Kiislamu la Iran (IRGC), ambalo ni maarufu hapa nchini kama Sepah, lijumuishwe kwenye kile kinachotajwa kama orodha ya “kigaidi” ya Umoja wa Ulaya. Pamoja na hayo, maamuzi yanayopitishwa na Bunge la Ulaya hayana ulazima wa kutekelezwa, bali yana sura ya kimapendekezo tu kwa Baraza la Ulaya.

Hatua hiyo dhidi ya Iran ya Bunge la Ulaya inaweza kutafsiriwa kama ishara ya kutoridhishwa, kuemewa na kupatwa na kiwewe nchi za Ulaya kutokana na mchango inaotoa IRGC katika suala la amani na usalama; na vilevile ni kiashiria cha bid’aa isiyo na uhalali wa kisheria iliyoanzishwa na Bunge la Ulaya ya kuinasibisha na ugaidi taasisi na chombo kilichoundwa kupitia katiba ya nchi huru na inayojitawala.

Hatua hii dhidi ya Iran ya Bunge la Ulaya vilevile haina msingi wa kisheria kulingana na Hati ya Umoja wa Mataifa. Sehemu ya kifungu cha 7 cha Ibara ya 2 ya Mkataba wa Umoja wa Mataifa inasema, “Hakuna masharti yoyote yaliyomo katika Hati hii yanayoidhinisha Umoja wa Mataifa kuingilia masuala ambayo kiasili ni sehemu ya mamlaka ya ndani ya kila nchi, na haiwalazimishi pia wanachama kuyahusisha masuala kama hayo na masharti ya Hati hii”.

Wakati huo huo, ikumbukwe pia kwamba, katika miezi ya hivi karibuni nchi za Ulaya na Umoja wa Ulaya, -ikiwa ni katika mwendelezo wa kuchochea zaidi fujo na machafuko nchini Iran na kudhoofisha nguvu na uwezo wa vikosi vya kijeshi na usalama vya Jamhuri ya Kiislamu ya Iran katika kuimarisha usalama- zimechukua hatua mara kadhaa za kuwawekea vikwazo makamanda wa kijeshi wa Iran; lakini licha ya hatua na njama zote hizo, kwa ung’amuzi na kuwa macho wananchi na kwa juhudi za vikosi vya ulinzi likiwemo Jeshi la Walinzi wa Mapinduzi ya Kiislamu, amani na usalama vimerejea katika miji mbalimbali ya Iran.

Ukweli ni kwamba, kwa kupambana vikali na makundi ya kigaidi, Sepah imetoa mchango mkubwa sana katika kurejesha amani na usalama nchini na katika eneo la Magharibi mwa Asia pia. Kupambana na magenge ya kigaidi ya ndani na nje ya nchi kuanzia genge la Munafikina (MKO) mpaka DAESH (ISIS) ni miongoni mwa kazi kubwa zilizofanywa na jeshi hilo la walinzi wa Mapinduzi ya Kiislamu; na katika njia hiyo, limetoa mhanga Mashahidi kadhaa akiwemo Shahidi Kamanda Qassem Soleimani na mashahidi wengine wa Muqawama.

Katika miaka ya karibuni, IRGC ilifanikiwa kuunda muungano imara katika mapambano dhidi ya ugaidi katika ukanda huu na hasa nchini Syria. Katika muungano huo, mbali na ushirikiano wa taasisi zingine kama majeshi ya Syria, Iraq na Russia, makundi ya wananchi yaliyoundwa kwa kufuata mfano wa jeshi la kujitolea la Muqawama la Basiji la nchini Iran, yalitoa mchango mkubwa na athirifu katika kupambana na ugaidi. Ukweli ni kwamba, kwa msaada wa vikosi hivyo vya kujitolea vya wananchi katika eneo, magenge ya kigaidi yaliangamizwa na mabaki ya magaidi wao yalitoroka. Kwa hivyo usalama unaoshuhudiwa sasa hivi katika eneo na kuzuiwa kusonga mbele DAESH, ambayo ilikuwa tishio kwa usalama wa nchi za Ulaya pia, ni matunda ya mapambano na jitihada kubwa zilizofanywa na IRGC pamoja na vikosi vya Muqawama za kukabiliana na magaidi.

Meja Jenerali Hossein Salami, Kamanda Mkuu wa Jeshi la Walinzi wa Mapinduzi ya Kiislamu naye pia amesisitiza juu ya suala hilo aliposema: Kama si juhudi kubwa zilizofanywa na Jeshi la Walinzi wa Mapinduzi ya Kiislamu na hasa kupitia mhimili wa Kikosi cha Quds kikiongozwa na Shahidi Soleimani, moto wa ugaidi uliowashwa na Wamarekani bila shaka ungewatambalia watu wa Ulaya; na usalama uliopo leo Ulaya ungelitoweka.