Kombe la Dunia Qatar, fursa kwa watu wa mataifa ya Kiarabu kuonyesha wanavyouchukia utawala wa Kizayuni wa Israel

Moja ya matukio ya kuvutia katika michuano ya Kombe la Dunia nchini Qatar ni kukataa wananchi wa mataifa mbalimbali ya Kiarabu kuhojiwa na vyombo vya habari vya Israel na vilevile kuiunga mkono Palestina dhidi ya utawala huo wa Kizayuni.

Kimsingi, Kombe la Dunia ni uwanja wa kujionea mandhari za maamiliano baina ya watu; mandhari ambazo ni nadra kushuhudiwa katika siku zingine kwenye nchi mbalimbali duniani. Halikadhalika, Kombe la Dunia ni jukwaa la watu kutoka nchi mbalimbali kufahamiana, na pia ni ulingo wa makabiliano ya kijamii na kimichezo baina ya nchi maalumu.

Hata hivyo, Kombe la Dunia la 2022 nchini Qatar limekuwa pia uwanja wa tukio maalumu, ambalo ni la watazamaji kutoka nchi mbalimbali, hasa za Kiarabu, kukataa kuhojiwa na vyombo vya habari na waandishi wa habari wa Israel; na wakati wa kufanyika mechi za michuano hiyo, kuliunga mkono taifa linalodhulumiwa la Palestina. Watazamaji wa Kiarabu wanapoendewa na waandishi wa habari wa Israel, wamekuwa wakikataa kuhojiwa; na badala yake kuwaeleza waandishi hao: “hakuna kitu kiitwacho Israel, na nchi mnayoikalia kwa mabavu inaitwa Palestina.”

Watazamaji kutoka Qatar, Tunisia, Lebanon na hata Saudi Arabia wamekataa kuhojiwa na waandishi wa habari wa Israel. Wakati timu yao inapocheza, watazamaji kutoka Tunisia wamekuwa wakibeba na kuonyesha mabango ya kuunga mkono Palestina, suala ambalo limekuwa la dhahir shahir mpaka vyombo vya habari vya Israel na Magharibi vimeamua kuliakisi.

Kanali ya 12 ya utawala wa Kizayuni imeweka wazi katika ripoti yake kwamba, kwa Watunisia, Palestina ni muhimu zaidi kuliko kitu chochote katika Kombe la Dunia. Mashabiki wengi wa timu ya Tunisia hushiriki katika maandamano ya kuunga mkono taifa la Palestina na wakati wa michezo hiyo, wanafikisha ujumbe wa kuliunga mkono taifa la Palestina na kubeba mabango kwenye viwanja vya soka yenye kaulimbiu ya ukombozi wa Palestina, mpaka baadhi yao wanayachukulia mashindano ya Kombe la Dunia kuwa ni fursa mwafaka ya kuwatangazia na kuwabainishia walimwengu habari na matukio ya Palestina.

Harakati hiyo ya watazamaji kutoka mataifa ya Kiarabu katika Kombe la Dunia la Qatar inaakisi nukta muhimu kadhaa za kijamii na kisiasa.

Nukta ya kwanza ni kwamba; katika nchi za Kiarabu, licha ya utegemezi walionao baadhi ya watawala wa nchi hizo kwa Magharibi na kuwa kwao kitu kimoja na utawala wa Kizayuni, wananchi Waislamu wa mataifa hayo wanapinga vikali hatua ya kuanzisha uhusiano na Israel; na badala yake wanaunga mkono piganio tukufu la ukombozi wa Palestina.

Nukta ya pili ni kuwa; harakati ya watazamaji wa mataifa ya Kiarabu kwa vyombo vya habari vya Israel na waandishi wake wa habari inaashiria mpasuko uliopo kati ya wananchi hao na baadhi ya tawala za Kiarabu juu ya suala la Palestina. Wakati serikali za Kiarabu zimeliweka pembeni suala la Palestina na kushupalia kuanzisha uhusiano na utawala unaokalia Quds tukufu kwa mabavu, kwa wananachi wa mataifa ya Kiarabu, suala la Palestina lingali ndilo suala kuu na la kiutambulisho kwao. Kwa hivyo, Kombe la Dunia nchini Qatar limedhihirisha upana mkubwa wa mapasuko uliopo kati ya matakwa ya wananchi na sera zinazofuatwa na tawala za Kiarabu.

Na nukya tatu ni kwamba; harakati iliyoonyeshwa na watazamaji kutoka mataifa ya Kiarabu dhidi ya waandishi wa habari na vyombo vya habari vya Kizayuni inamaanisha kushindwa na kugonga ukuta pia mchakato wa kuanzisha uhusiano wa kawaida na utawala haramu wa Israel. Wakati watawala wa baadhi ya nchi za Kiarabu wanazuia kufanyika maandamano yoyote ya kupinga mchakato wa kuanzisha uhusiano wa kawaida na utawala wa Kizayuni ndani ya nchi zao, Kombe la Dunia la Qatar limegeuzwa kuwa fursa kwa wananchi wa nchi mbalimbali za Kiarabu kubainisha upinzani wao dhidi ya mchakato huo. Hii inaonyesha kuwa kiuhalisia, mpango wa kuanzisha uhusiano wa kawaida na utawala wa Kizayuni ni mchakato uliofeli na kugonga mwamba, kwa sababu haujapata uungaji mkono wowote wa wananchi.