Kuendelea uingiliaji hasi wa Marekani katika masuala ya ndani ya Iraq

Marekani ingali inaendelea kuingilia masuala ya ndani ya Iraq kwa namna hasi, kwa kuzingatia nyenzo za mashinikizo ilizonazo mikononi mwake.

Tangu mwaka 2003, Iraq imejionea enzi mpya katika siasa na muundo wake wa madaraka. Mnamo mwaka huo, Marekani iliishambulia na kuivamia kijeshi nchi hiyo na kuupindua utawala wa Kibaathi. Japokuwa tukio hilo lilihitimisha mfumo wa kidikteta nchini Iraq, lakini pia lilitayarisha mazingira ya uingiliaji mkubwa wa Marekani katika masuala ya ndani ya nchi hiyo, kwa namna ambayo, leo hii Washington inaingilia hata masuala madogo kabisa ya ndani ya Iraq. Marekani imejenga moja ya balozi zake kubwa zaidi duniani huko Baghdad, ambapo mbali na wanasiasa, mamia ya wanajeshi wa nchi hiyo pia wamepiga kambi katika ubalozi huo.

Tangu mwaka 2003 hadi leo, Marekani imejaribu kutumia visingizio mbalimbali kuendeleza ushawishi na uwepo wake nchini Iraq. Ushawishi huo, ambao umebadilika na kuwa uingiliaji, haujailetea Iraq amani na usalama, kwa sababu kundi la kigaidi la DAESH (ISIS) liliishambulia kijeshi Iraq na kushikilia theluthi moja ya ardhi ya nchi hiyo wakati wanajeshi wa Marekani wakiwa nchini humo. Hata hivyo, uingiliaji huo umekuwa na changamoto kubwa kwa Iraq, mfano mpya ukiwa ni wa kushuka thamani ya sarafu ya dinari ya nchi hiyo dhidi ya ile ya Marekani ya dola. Katika siku za hivi karibuni, gazeti la al-Madaa la Iraq, likinukuu vyanzo vya habari vya nchi hiyo liliandika, “wizara ya fedha ya Marekani imeripoti kwa kunukuu nyaraka za Benki Kuu ya Iraq, kwamba benki na taasisi za fedha zaidi ya 60 za nchi hiyo zinafanya kazi nje ya viwango halisi vya mfumo wa kibenki; na kwa kweli kwa kughushi nyaraka za kibiashara na hasa bidhaa zinazoagizwa kutoka nje, zinawasaidia wafanya magendo ya sarafu ya dola kuhamisha fedha hizo kwa kutumia kichaka cha uingizaji bidhaa.”

Safwan Qausi, mwanauchumi wa Iraq anaitakidi kuwa, kupanda kwa bei ya dola ya Marekani katika soko la Iraq kunatokana na vizuizi vipya ambavyo wizara ya fedha ya Marekani imeviweka kuhusiana na kinachoitwa “mabadilishano ya kifedha na baadhi ya nchi”. Bila kutaja moja kwa moja nchi hizo, Qausi anaeleza kwamba, baadhi ya nchi hizo ni “washirika wa kibiashara wa Iraq”. Kwa mujibu wa mwanauchumi huyo, baadhi ya wafanyabiashara wameanza kuingiza bidhaa kutoka nje ya nchi bila kuzingatia vizuizi hivyo, na kutokana na matatizo yanayojitokeza katika uhamishaji fedha kupitia njia rasmi, wanalazimika kutafuta fedha wanazohitaji kupitia njia zisizo rasmi; hatua ambayo imesababisha kupanda kwa bei ya dola katika soko lisilo rasmi.

Mtazamo wa ujumla ilionao Marekani ni kuhakikisha muundo wa madaraka wa Iraqi hauwi na ufanisi wowote. Na sababu kuu, ni kubaki kuwa na utegemezi kwa Marekani na kuzizushia matatizo serikali za nchi hiyo zinazotaka kuwa na misimamo huru. Mbali na sera hizo, serikali ya Marekani inatekeleza pia mashinikizo ya juu kabisa dhidi ya makundi ya mapambano na muqawama ya Iraq ili kuiongezea nchi hiyo changamoto za ndani. Vizuizi vipya ambavyo hivi karibuni Marekani iliiwekea serikali ya Iraq kuhusu “mabadilishano ya kifedha na baadhi ya nchi” vinalenga kuathiri sera ya mambo ya nje ya nchi hiyo na kuizuia isiwe huru katika sera zake hizo au kuendeleza uhusiano na nchi jirani zikiwemo Iran na Syria.

Kwa kuzingatia serikali mpya iliyoundwa hivi karibuni nchini Iraq inayoongozwa na waziri mkuu Muhammad Shia’ Al Sudani, Marekani imejaribu kutumia kila njia ili kuhakikisha mlingano wa nguvu nchini Iraq haubadiliki kwa madhara yake. Kwa sababu hiyo, imeanzisha baadhi ya mashinikizo dhidi ya serikali kuu, hasa ya upande wa kiuchumi. Inaonekana kwamba, kutokana na ushawishi mkubwa ilionao Marekani nchini Iraq na pia kwa sababu ya uwezo wake wa kutekeleza mashinikizo hususan ya kiuchumi, serikali za Iraq haziwezi kupunguza uingiliaji wa Marekani katika masuala ya ndani ya nchi hiyo, na bila shaka zitagharimika mno kwa sababu ya suala hilo.