Mazungumzo ya kusitisha mapigano huko Gaza kwa upatanishi wa Misri, Qatar na Marekani yamemalizika bila natija huuko Cairo na ujumbe wa Hamas umeondoka katika mji mkuu huo wa Misri.
Shirika la habari la Reuters, likiwanukuu maafisa wawili wa Misri, limeripoti kuwa mazungumzo ya kusitisha mapigano kati ya Israel na Hamas yamemalizika bila kupatikana matokeo yoyote ya maana.
Kulingana na ripoti hii, wajumbe wa Hamas na Israel hawakukubaliana na vifungu vya makubaliano yaliyowasilishwa na wapatanishi.
Kabla ya kuondoka Cairo, ujumbe wa Hamas umesisitiza tena kwamba, “Makubaliano yoyote lazima yaafiki usitishaji vita kamili, kuondoka kabisa Waisraeli kutoka Gaza, kurejea wakimbizi katika makazi yao, pamoja na makubaliano ya kubadilishana wafungwa.”
Harakati ya Mapambano ya Kiislamu ya Palestina (Hamas) imekuuwa ikisisitiza kuwa makubaliano yoyote na utawala ghasibu wa Israel lazima yahakikishe usitishaji kamili wa vita huko Gaza, kuondoka kikamilifu majeshi ya Israel katika eneo hilo na makubaliano ya kubadilishana wafungwa.
Sambamba na kufanyika mazungumzo hayo, Israel inaendeleza mauaji ya kimbari huko Gaza na ripoti zinaonyesha kuwa, zaidi ya Wapalestina 40,000 wameuawa shahidi na wengine zaidi karibu laki moja wamejeruhiwa katika mashambulizi hayo.
Israel ilianzisha vita vya mauaji ya kimbari dhidi ya Wapalestina wa Gaza tarehe 7 Oktoba baada ya harakati ya mapambano ya Kiislamu ya Palestina ,Hamas, kuendesha mashambulizi ya kushtukiza ya Kimbunga cha Al-Aqsa dhidi ya utawala katili wa Israel ili kukabiliana na jinai za miongo kadhaa za utawala huo dhidi ya Wapalestina.
