Rais Samia Suluhu Hassan wa Jamhuri ya Muungano wa Tanzania ametangaza siku saba za maombolezo ya kitaifa kufuatia kifo cha Rais mstaafu Mzee Ali Hassan Mwinyi kilichotokea jana.
Taarifa zaidi zinasema kuwa, katika kipindi hiki cha maombolezo ya kitaifa bendera zitapepea nusu mlingoti.
Nina huzuni kutangaza kifo hiki,” amesema Rais Samia Suluhu Hassan, na kuongeza kuwa rais huyo wa zamani alikuwa akitibiwa saratani ya mapafu. Mwinyi alilazwa London Novemba 2023 kabla ya kurejea kuendelea na matibabu Dar es Salaam, ameongeza Rais wa Tanzania.
Rais Samia ameongeza kuwa, kiongozi huyo aliyeleta mabadiliko ya kidemokrasia Tanzania, atazikwa hapo kesho Jumamosi huko Unguja Zanzibar.
Mwinyi alichaguliwa na mwanzilishi wa taifa la Tanzania Julius Kambarage Nyerere kama mrithi wake, na alichukua uongozi wa nchi iliyokuwa katika mgogoro wa kiuchumi, kufuatia majaribio ya kisosholisti ya miaka kadhaa yaliyofeli.
Mwinyi aliondoa vikwazo katika biashara za kibinafsi na kulegeza sheria za ununuzi wa bidhaa kutoka nje, jambo lililompelekea kupewa jina la utani, “Mzee Rukhsa.”
Akiwa alizaliwa Mei 8, 1925 katika koloni la zamani la Uingereza lililoitwa Tanganyika, Mwinyi alihamia Zanzibar kusomea Uislamu. Babake alitazamia kwamba mwanawe atakuwa kiongozi wa kidini ila Mwinyi ambaye alikuwa kijana wakati huo, akawa mwalimu kabla kuingilia siasa katika miaka ya 1960 baada ya tanganyika kupata uhuru wake.
Kufuatia muungano wa Tanganyika iliyokuwa inajitegemea na Zanzibar uliopelekea kubuniwa kwa Tanzania mwaka 1964, Mwinyi alihudumu kama balozi wa Tanzania nchini Misri. Alihudumu pia kama waziri wa afya, masuala ya ndani na maliasili katika miaka ya 1970 na 1980.
Mwaka 1984, akawa rais wa Zanzibar kabla Nyerere hajamchagua kuiongoza Tanzania. Alipongezwa kwa kufungua milango ya demokrasia ya vyama vingi mwaka 1992 na kuvikubalia vyama vya upinzania kuwania nyadhfa katika uchaguzi, miaka mitatu baadae, alipoachia ngazi.
