Sultan Haitham bin Tariq Aal Said w Oman leo Jumapili amempokea rasmi Rais Samia Suluhu Hassan wa Jamhuri ya Muungano wa Tanzania mara baada ya kuwasili nchini humo. Rais Samia yuko katika ziara ya kikazi ya siku tatu nchini Oman.
Uhusiano wa Tanzania na Oman hasa Zanzibar na maeneo ya pwani ya Afrika Mashariki yakiwemo pia maeneo ya ndani ya Afrika Mashariki na Kati, yana uhusiano mkubwa na jadi na Oman. Wananchi wa pande hizo zote wana uhusiano wa damu na wa jadi, ukiwemo wa kiutamaduni.
Mwezi Mei, Oman na Tanzania zilitiliana saini hati ya pamoja ya maelewano katika masuala ya uvuvi na safari za baharini, ikiwemo Oman kuanzisha shamba la kuvuna samaki visiwani Zanzibar kwa kiwango cha tani 1,000 za samaki kila mwaka, katika awamu ya kwanza ya mradi huo. Mradi huo wa kuvuna samaki visiwani Zanzibar umekusudiwa kufikia tani 3,000 kwa mwaka katika awamu yake ya pili na tani 6,000 katika mwaka wake wa tatu.
Oman na Tanzania zina uhusiano mzuri pia na wa muda mrefu wa kisiasa huku kila mwaka zikifanya vikao vya pamoja. Kikao cha karibuni kabisa ni kile kilichofanyika mwezi Machi mwaka huu.
Katika mazungumzo yao nchi hizo mbili zilitilia mkazo kuimarishwa mazungumzo na njia za amani za kutatua migogoro mbalimbali pamoja na kusaidia kuimarisha amani na usalama kimataifa.
