Beirut, Lebanon – Rais wa Lebanon Michel Aoun ametoa wito wa kufanyika kwa mazungumzo ya “haraka” ya kitaifa kati ya vyama tawala vya nchi hiyo huku akilaani miezi kadhaa ya kupooza kisiasa serikalini.
“Uvurugaji wa kimakusudi, wa kimfumo na usio na msingi unaosababisha kuvunjika kwa taasisi na serikali lazima ukome,” Aoun alisema katika hotuba ya televisheni siku ya Jumatatu, akiongeza kuwa anahofia inaweza kusababisha “maangamizi ya taifa”.
Baraza la mawaziri la Lebanon chini ya Waziri Mkuu Najib Mikati halijakutana tangu Oktoba 12 kutokana na kuzozana kuhusu uchunguzi wa mlipuko mbaya wa bandari ya Beirut mwaka jana, na kuendelea kwa mpasuko wa kidiplomasia na Saudi Arabia na baadhi ya mataifa ya Ghuba.
Kutokana na hali hiyo, serikali imeshindwa kuchukua hatua za haraka kukabiliana na mgogoro wa kiuchumi nchini humo.
Tangu Agosti 2019, pauni ya Lebanon imepoteza zaidi ya asilimia 90 ya thamani yake huku zaidi ya robo tatu ya wakazi wake wakitumbukia katika umaskini.
Kiwango cha mfumuko wa bei nchini humo kimezidi kile cha Venezuela na Zimbabwe zilizokumbwa na mzozo. Benki ya Dunia imesema mzozo wa kifedha wa Lebanon ni moja wapo mbaya zaidi tangu katikati ya karne ya 19.
Wiki iliyopita, Aoun alisema Lebanon inahitaji “miaka sita hadi saba” ili kujinasua kutoka kwenye mzozo huo.
Katika hotuba yake siku ya Jumatatu, rais wa Lebanon pia alilikosoa bunge kwa kutopitisha mageuzi muhimu ya kiuchumi na kimuundo.
“Vizuizi bungeni vimechangia kuvunjika kwa serikali,” alisema.
“Sheria ya udhibiti wa mtaji ilipaswa kupitishwa miaka miwili na miezi miwili iliyopita, na ingechangia katika kurejesha fedha.”
Jumuiya ya kimataifa kwa miaka mingi imekuwa ikiishinikiza Lebanon kufanya mageuzi katika uchumi wake, kutekeleza taratibu za kukabiliana na ufisadi, na kufikia makubaliano na Shirika la Fedha la Kimataifa IMF ili kufungua mabilioni ya dola katika misaada ya kimaendeleo.
Msuguano na Hezbollah
Aoun katika hotuba yake pia aliashiria mvutano kati yake na Hezbollah inayoungwa mkono na Iran, mshirika mkuu wa miaka 16 wa chama chake cha ‘Free Patriotic Movement.’
Alisema alitaka Lebanon kuwa na uhusiano thabiti na nchi za Ghuba, ambazo zimedorora katika kipindi cha mwaka mmoja uliopita.
Lebanon inajitahidi kutatua mzozo wa kidiplomasia na Saudi Arabia, Bahrain, Umoja wa Falme za Kiarabu na Kuwait, ambazo zimekuwa zikiikosoa Hezbollah kwa jukumu lao nchini Yemen na migogoro mingine ya kikanda.
“Ni nini uhalali wa kuvuruga uhusiano na nchi hizi na kuingilia mambo ambayo hayatuhusu?” Aoun aliuliza.
Aoun alisema ni mashirika ya usalama ya Lebanon pekee ndiyo yanapaswa kuchukua nafasi kubwa katika mkakati wa ulinzi wa nchi hiyo.
“Ni kweli kwamba kulinda nchi kunahitaji ushirikiano kati ya jeshi, watu na upinzani,” Aoun alisema.
“Lakini jukumu la msingi liko kwa serikali. Ni serikali pekee inayoweka mkakati wa ulinzi na kuhakikisha utekelezaji wake.”
