Rais wa Senegal aakhirisha uchaguzi wa rais wa Februari 25 kwa muda usiojulikana

Rais Macky Sall wa Senegal ametangaza kuakhirisha kwa muda usiojulikana uchaguzi wa urais uliopangwa kufanyika Februari 25, saa chache kabla ya kampeni rasmi kuanza.

Katika hotuba yake kwa taifa siku ya Jumamosi, Sall alisema ametia saini amri ya kukomesha hatua ya awali iliyoweka tarehe hiyo, kwa sababu wabunge walikuwa wakiwachunguza majaji wawili wa Baraza la Katiba ambao uadilifu wao katika mchakato wa uchaguzi umetiliwa shaka.

“Nitaanzisha mazungumzo ya wazi ya kitaifa ili kuleta pamoja masharti ya uchaguzi huru, wa wazi na shirikishi,” alieleza Sall bila kutoa tarehe mpya ya uchaguzi huo.

Ni mara ya kwanza kwa uchaguzi wa rais wa Senegal kuahirishwa. Uamuzi huo umekuja kufuatia mzozo kati ya Bunge la Taifa na Mahakama ya Katiba kuhusu kukataliwa kwa wagombea.

Amri ya Novemba 2023 iliyotiwa saini na Sall iliweka tarehe ya uchaguzi huo wa rais kuwa Februari 25, huku wagombea 20 wakiwa katika kinyang’anyiro lakini viongozi wawili wakuu wa upinzani hawakujumuishwa.

Sall alishatangaza mara kadhaa kwamba angekabidhi madaraka mapema mwezi wa Aprili kwa mshindi wa uchaguzi huo.

Baada ya kutangaza kuwa hatagombea muhula wa tatu kama rais, Sall alimteua Waziri Mkuu Amadou Ba kutoka chama chake kuwa mrithi wake.

Baraza la Katiba limewaondoa baadhi ya wagombea kwenye kinyang’anyiro hicho, akiwemo kiongozi wa upinzani na mpinzani mkubwa wa mfumo tawala wa Senegal Ousmane Sonko, ambaye amefungwa jela tangu Julai 2023, na Karim Wade, mtoto wa rais wa zamani Abdoulaye Wade.

Wafuasi wa Wade katika Bunge la Taifa walitaka uchunguzi wa bunge ufanyike kuhusu upendeleo wa majaji wawili wa Mahakama ya Katiba, na hoja hiyo ilipitishwa na Bunge hilo Januari 31 na kuungwa mkono na baadhi ya wajumbe wa chama cha Rais Sall pia…/