ALIYEKUWA Gavana wa Nairobi, Bw Mike Sonko, ameapa kuhudhuria mkutano wa hadhara unaotarajiwa kuongozwa na kinara wa ODM, Bw Raila Odinga, katika uwanja wa Tononoka ulio Mombasa kesho Jumamosi.
Iwapo mkutano huo utafanyika ilivyopangwa, itakuwa ni mara ya kwanza Bw Sonko kukutana hadharani na Mbunge wa Mvita, Bw Abdulswamad Nassir, ambao wote ni wagombeaji ugavana Mombasa kupitia vyama vya Wiper na ODM mtawalia.
Licha ya pingamizi dhidi yake kutoka kwa viongozi wa ODM Mombasa, Bw Sonko amekuwa akisisitiza atatumia rasilimali zake kupigia debe Bw Odinga kwa urais chini ya Muungano wa Azimio la Umoja One Kenya ambapo Wiper ni mshirika.
“Tukutane sote kwa mkutano wa hadhara wa Azimio katika uwanja wa Tononoka ifikapo Jumamosi ili tumwonyeshe upendo mgombeaji wetu wa urais atakayekuwa rais wa tano wa Kenya,” akasema, kupitia mitandao ya kijamii.
Hata hivyo, alitoa makataa kwamba kuunga mkono Bw Odinga itakuwa kama kiongozi wa Wiper, Bw Kalonzo Musyoka, ndiye atakuwa mgombea mwenza wake kwa uchaguzi wa urais.
