Mamlaka ya Kongo ilitangaza Jumanne kwamba watu wasiopungua 129 waliuawa wakati wafungwa walipojaribu kutoroka kutoka jela kuu la nchi hiyo.
Kulingana na ripoti ya “PBS” ya IRNA Jumanne usiku, kulingana na maafisa, wafungwa wengine walipigwa risasi na walinzi na wengine walikufa kutokana na msongamano.
Hii ni huku wanaharakati hao wakidai kuwa idadi ya waliofariki ni zaidi ya takwimu zilizotangazwa.
Waziri wa Mambo ya Ndani wa Kongo Jacquemin Shabani aliandika kwenye mtandao wa kijamii kwamba tathmini ya awali ilionyesha wafungwa 24 waliuawa kwa risasi za “onyo” zilizopigwa na walinzi walipokuwa wakijaribu kutoroka kutoka kwa Gereza Kuu la Makala katika mji mkuu Kinshasa mapema Jumatatu.
Aliongeza: “Pia, majeruhi 59 wamehudumiwa na baadhi ya wanawake waliofungwa wamebakwa katika kituo hiki.”
Waziri wa mambo ya ndani wa Kongo alisisitiza kuwa sasa utulivu umerejeshwa katika gereza hilo, ingawa sehemu yake iliteketezwa huku wafungwa wakijaribu kutoroka.
Wafungwa wa kiume na wa kike wamehifadhiwa katika gereza hili.
Bado haijabainika iwapo waathiriwa wote 129 wa ghasia hizi ni wafungwa au la. Pia, haijulikani jinsi msongamano ulivyotokea katika kituo hicho
Amnesty International ilitangaza katika ripoti yake ya hivi punde kwamba Makala, jela kubwa zaidi ya Kongo yenye uwezo wa kubeba watu 1,500, inawahifadhi wafungwa zaidi ya 12,000, ambao wengi wao wanasubiri kuhukumiwa.
Kumekuwa na majaribio ya kutoroka kutoka katika gereza hili hapo awali.
Mnamo 2017, washiriki wa madhehebu ya kidini walishambulia gereza hili na kuwaachilia wafungwa kadhaa.
Kulingana na wanaharakati wa haki za binadamu, Makala – miongoni mwa magereza mengine ya Kongo – yamejaa na wafungwa mara nyingi hufa kwa njaa. Makumi ya wafungwa wameachiliwa katika miezi ya hivi karibuni kama sehemu ya juhudi za kupunguza idadi ya wafungwa.
Huku wakitaka uchunguzi huru ufanyike, makundi ya haki za binadamu na upinzani yaliishutumu serikali kwa kutumia nguvu kupita kiasi na kuficha idadi halisi ya vifo.
