Afisa mmoja wa Palestina anasema takriban wakazi 13,000 Wapalestina katika mji wa al-Quds (Jerusalem) unaokaliwa kwa mabavu huenda wakalazimika kuyahama makazi yao kutokana na sera za ukandamizaji za utawala ghasibu wa Israel.
Raia wa al-Quds wapatao 13,000 wanatishiwa kuhama kwa lazima kutoka ardhi zao za jadi katika Jiji la Kale la al-Quds linalokaliwa kwa mabavu ili kupisha nyumba za Wayahudi pekee, masinagogi, bustani na makumbusho ya Biblia, Mshauri wa Ofisi ya Rais wa Palestina kuhusu Masuala ya al Quds, Ahmed Al-Ruwaidi, ameonya.
Katika taarifa yake, Al-Ruwaidi amesema uchimbaji unatokelekezwa na mamlaka ya Israel na ufunguzi wa mahandaki katika eneo la Msikiti wa Al-Aqsa unalenga kuimarisha makaazi ya walowezi wa Kiyahudi katika eneo la Mji Mkongwe wa al Quds, na kuwalazimisha Wapalestina eneo hilo waondoke kwa kuhofia uchimbaji uliofanywa chini ya nyumba zao au sera ya uhamishaji wa kulazimishwa inayotekelezwa na mamlaka ya Israeli dhidi yao kwa miaka kadhaa.
Amedokeza kwamba utawala wa kikoloni wa Israel unataka kuwasilisha masimulizi bandia ya Talmudi ambayo hayana msingi wa kihistoria kwa gharama ya ukweli wa kihistoria wa turathi za Waarabu wenye asili Kanaani.
“Tumekuwa tukifanya kazi kwa miezi kadhaa kukusanya hati kubwa zaidi za kihistoria zinazoakisi ukweli kuhusu Msikiti uliobarikiwa wa Al-Aqsa na maeneo yake ya karibu,” amesema na kusisitiza kwamba hati na simulizi zote za zamani na za Uthmaniyya hadi leo zinathibitisha kwamba mji wa al-Quds ni wa Kiarabu wenye historia ya Kiislamu na Kikristo.
Utawala wa Kizayuni unachukua hatua hizo za kibeberu kuhusiana na mji wa al-Quds na msikiti wa Al Aqsa wakati Shirika la Umoja wa Mataifa la Elimu, Sayansi na Utamaduni UNESCO lilipitisha azimio mwaka 2016 lililopinga kuwepo uhusiano wowote wa kihistoria, kidini au kiutamaduni kati ya Mayahudi na maeneo matakatifu ya mji wa al-Quds na hasa msikiti wa Al Aqsa na kusisitiza kuwa, msikiti huo ni mahala patakatifu kwa Waislamu.
Mji wa Quds ulipo msikiti wa Al Aqsa ambao ni kibla cha kwanza cha Waislamu ni sehemu isiyotenganika na ardhi ya Palestina na moja ya maeneo matatu muhimu zaidi matakatifu ya Kiislamu.
