Wabunge kutoka mabunge ya Afrika mashariki wametoa wito kwa serikali za kanda kutenga fedha zaidi kwa kilimo na ufugaji wa mifugo ili kukabiliana na uhaba wa chakula.
Wajumbe wa Muungano wa Bunge la Afrika Mashariki wa Usalama wa Chakula na Lishe (EAPA) walitoa wito huo katika ufunguzi wa mkutano wao wa siku tatu, uliofunguliwa rasmi Alhamisi katika mji mkuu wa Rwanda, Kigali.
Wabunge kutoka nchi tisa wanajadili nafasi ya wabunge katika uwekezaji mkubwa katika kilimo cha familia kwa ajili ya kustahimili chakula na lishe bora katika Afrika mashariki.
Abdi Ali Hassan, mwenyekiti wa EAPA alisema wabunge wanaweza kuchukua jukumu muhimu katika kuunda mabadiliko muhimu ili kuhakikisha usalama wa chakula katika bara la Afrika.
Alisema wabunge wote wanapaswa kutumia madaraka yao kuwawezesha wananchi kujitambua na kujikwamua na lishe duni kwa kutenga rasilimali kupitia wizara husika za kilimo na watoa huduma wengine wa kilimo.
Donatille Mukabalisa, spika wa Bunge la Rwanda aliuambia mkutano huo kuwa changamoto zinazohusiana na kilimo, usalama wa chakula, na lishe hazina mipaka na hivyo, kufanya kazi pamoja huruhusu nchi kujifunza kutoka kwa kila mmoja na kubadilishana uzoefu.
Naye Jean-Leonard Touadi, afisa kutoka Shirika la Chakula na Kilimo la Umoja wa Mataifa (FAO), alihutubu katika kikao hicho na kusema kutokana na mtikisiko wa uchumi wa dunia hivi sasa, jukumu la wadau mbalimbali linahitajika ili kukabiliana na sababu za uhaba wa chakula kwa sababu unaathiri ustawi na maendeleo ya taifa.
Wabunge hao watatathmini utekelezaji wa ahadi zilizotolewa na serikali za Afrika za kutenga asilimia 10 ya bajeti ya taifa kwa ajili ya kilimo.
Mwezi uliopita, Shirika la Mpango wa Chakula Duniani (WFP) lilisema katika ripoti yake ya hivi punde ya kukabiliana na ukame kwamba takriban watu milioni 22 wanakabiliwa na uhaba wa chakula kutokana na ukame kote nchini Kenya, Ethiopia na Somalia.
