Makumi ya waigizaji nyota wa filamu duniani wamejitokeza na kutangaza kumuunga mkono muigizaji mwenzao wa Uingereza, Emma Watson, ambaye hivi karibuni alishambuliwa vikali na maafisa wa utawala wa Kizayuni wa Israel kwa kuchapisha kwenye ukurasa wake wa Instagram ujumbe wa kuwaunga mkono wananchi madhulumu wa Palestina.
Faraan: Waraka uliosaniwa na zaidi ya waigizaji 40 mashuhuri duniani umesema: Tunasimama na Emma Watson, kuunga mkono sentensi nyepesi inayosema, ‘mshikamano ni kitenzi’ ukiwemo mshikamano na Wapalestina, ambao wanapigania haki zao za binadamu chini ya sheria za kimataifa.
Waraka huo uliosaniwa na nyota hao wa filamu duniani umeeleza bayana kuwa, “tunatambua kutokuwepo na mlingano wa nguvu baina ya Israel, utawala unaokalia kwa mabavu (ardhi za Palestina) kwa upande mmoja, na Wapalestina, watu walioko chini ya mfumo wa kibaguzi na uvamizi wa kijeshi kwa upande mwingine.”
Wiki iliyopita, maafisa wa utawala haramu wa Israel waliingiwa na kiwewe na kumshambulia vikali kwa maneno Watson, kwa kusambaza kwenye ukurasa wake wa mtandao wa kijamii wa Instagram picha iliyokuwa na ujumbe wa kuonyesha mshikamano na wananchi wa Palestina.
Wafuasi zaidi ya milioni moja wa Emma Watson ambaye alipata umashuhuri zaidi kutokana na uigizaji wake kwenye mfululizo wa filamu za ‘Harry Potter’ pia wametangaza kuunga mkono ujumbe wa muigizaji huyo nyota wa kusimama bega kwa bega na wananchi wanaodhulumiwa na kukandamizwa kila uchao wa Palestina.
