Rais Xi Jinping wa China amesema serikali ya Beijing inaunga mkono jitihada za taifa la Palestina zinazolenga kuhuisha haki za msingi za Wapalestina.
Xi Jingping amesema hayo katika mazungumzo yake na Rais wa Mamlaka ya Ndani ya Palestina, Mahmoud Abbas huko Riyadh, mji mkuu wa Saudi Arabia, pambizoni mwa Kongamano la Kwanza la China na Madola ya Kiarabu.
Rais wa China ameeleza kuwa, China inaunga mkono jitihada za miongo kadhaa sasa za Wapalestina za kupigania haki zao mkabala wa Israel.
Amesema China na Palestina zimekuwa na uhusiano wa kidugu wa muda mrefu, na kwamba anatumai pande mbili hizo zitaendelea kushirikiana kama zilizofanya katika kipindi cha zaidi ya nusu karne iliyopita.
Rais wa China ameeleza bayana kuwa, “Haijalishi ni kwa kiasi gani hali ya kieneo na kimataifa zitabadilika, lakini China inaunga mkono kwa dhati njia ya watu wa Palestina, na daima itaendelea kusimama nao.”
Kwa upande wake, Rais wa Mamlaka ya Ndani ya Palestina amesema Wapalestina wanaishukuru na kuipongeza China kwa uungaji mkono wake usio na kifani kwa wananchi madhulumu wa Palestina.
Mahmoud Abbas amebainisha kuwa: Taifa la Palestina linaona fakhari kuwa na uhusiano na watu wa China. Kama nchi yenye ushawishi mkubwa duniani, China daima imekuwa ikiliunga mkono taifa la Palestina.”
