اسرائیلی تھنک ٹینک کے مرکز کی غزہ جنگ میں صہیونی ریاست کو ہونے والے نقصانات سے نقاب کشائی

فاران: اسرائیلی تھنک ٹینک “اندرونی سلامتی” نے 15 ماہ کی جنگ “طوفان الاقصیٰ” کے دوران صہیونی حکومت کو ہونے والے نقصانات اور ہلاکتوں کے بارے میں نئی تفصیلات جاری کی ہیں۔
بین الاقوامی خبر رساں ادارہ فارس کے مطابق، اسرائیلی تھنک ٹینک کے ایک مرکز کی رپورٹ میں بتایا گیا ہے کہ 7 اکتوبر 2023 سے لے کر غزہ میں جنگ بندی کے نفاذ تک، 1,845 اسرائیلی ہلاک ہوئے، جن میں 841 فوجی شامل تھے۔ اسی طرح، 23,955 اسرائیلی زخمی ہوئے، اور اب بھی 82 اسرائیلی قیدی غزہ میں مزاحمتی گروہوں کے پاس ہیں۔
اس تھنک ٹینک نے مزید انکشاف کیا کہ اس جنگ کے دوران 143,000 صہیونی آبادکار مقبوضہ بستیوں سے فرار ہو گئے، اور مجموعی طور پر 27,000 راکٹ، میزائل اور ڈرونز اسرائیل کے خلاف داغے گئے، جن میں سے 13,400 غزہ کی پٹی سے مقبوضہ علاقوں کی طرف فائر کیے گئے۔
اس رپورٹ کے مطابق، مغربی کنارے میں 61 اسرائیلی ہلاک ہوئے، جن میں 25 قابض پولیس اہلکار شامل تھے۔
دیگر محاذوں کے حوالے سے، اس تھنک ٹینک نے لکھا کہ لبنان اور شام کے دو محاذوں پر 43 صہیونی بستیاں خالی کی گئیں اور 68,500 آبادکار اپنے گھروں سے فرار ہو گئے۔ لبنان اور شام سے 19,500 راکٹ، میزائل اور ڈرونز مقبوضہ فلسطین کی جانب فائر کیے گئے۔
یمن کے محاذ پر، غزہ اور اس کی مزاحمت کی حمایت میں یمنی مسلح افواج نے 370 میزائل اور ڈرون حملے کیے، جبکہ 400 سمندری کارروائیاں بھی انجام دی گئیں۔
اس رپورٹ کے مطابق، ایران نے بھی اس دوران 321 بیلسٹک میزائل، 30 کروز میزائل اور 170 ڈرونز مقبوضہ فلسطین کی طرف فائر کیے۔ اسی طرح، عراق کے محاذ سے بھی 300 میزائل اسرائیل کی طرف داغے گئے۔
مالی نقصانات کے حوالے سے، اسرائیلی اخبار یدیعوت آحارانوت نے گزشتہ روز لکھا کہ جنگ کی لاگت اسرائیل کے لیے جنوری 2025 کے وسط تک 150 ارب شیکل (تقریباً 42 ارب ڈالر) تک پہنچ چکی ہے، جس کا یومیہ اوسط 300 ملین شیکل (تقریباً 84 ملین ڈالر) ہے۔
دوسری جانب، غزہ کی وزارت صحت نے گزشتہ روز اعلان کیا کہ مزید 42 شہداء کے اجساد ملبے سے نکالے گئے، جبکہ ایک زخمی شخص جو اسپتال میں زیر علاج تھا، شہید ہو گیا۔ اس طرح، غزہ میں 15 ماہ کی جنگ کے دوران شہداء کی تعداد 47,460 تک پہنچ گئی۔