شہید فلسطینی کی نماز جنازہ میں ہزاروں افراد کی شرکت، انتقام کے نعرے

فاران: قابض اسرائیلی فوج کے ہاتھوں شہید ہونے والے یونس تایہ کی نماز جنازہ میں ہزاروں فلسطینیوں نے شرکت کی۔ تایہ کو کل بدھ کی صبح طوباس کے جنوب میں الفارعہ پناہ گزین کیمپ میں اسرائیلی فوج کی فائرنگ سے شہید کر دیا گیا تھا۔

شہید کی نماز جنازہ کیمپ کی مسجد کے گراؤنڈ میں ادا کی گئی۔ اس کے بعد اسے ایک جلوس کی شکل میں مقامی قبرستان لے جایا گیا جہاں اس کی تدفین کی گئی۔ اس دوران قابض فوج نے جنازے کے جلوس پر شیلنگ بھی کی جب کہ فلسطینی شہریوں اور جنازے کے شرکا نے صہیونی ریاستی دہشت گردی کے خلاف شدید نعرے بازی کی اور انتقام انتقام کے نعرے لگائے۔

سوگواروں نے قابض دشمن کے خلاف مزاحمت جاری رکھنے کی حمایت کی اور فلسطینی مجاھدین پر زور دیا کہ وہ قابض دشمن کے خلاف مزاحمت جاری رکھیں۔

جنازے کے شرکا نے فلسطینی اتھارٹی کی طرف سے قابض اسرائیلی دشمن کے ساتھ جاری سکیورٹی تعاون پر بھی شدید تنقید کی اور رام اللہ اتھارٹی پر زور دیا کہ وہ دشمن کے ساتھ تعاون ختم کرے۔

خیال رہے کہ کل بدھ کو اکیس سالہ فلسطینی نوجوان یونس غسان تایہ طوباس میں الفارعہ کیمپ میں اسرائیلی فوج کی دہشت گردی کے نتیجے میں جام شہادت نوش کرگیا تھا۔ قابض فوج نے تایہ کو قریب سے اس کے سینے میں گولی ماری جس اس کے لیے جان لیوا ثابت ہوئی۔