صہیونی ریاست کی شام میں اپنی موجودگی کو مستحکم کرنے کی کوشش

فاران: صہیونی ریاست کے وزیر جنگ نے فوجیوں کو حکم دیا ہے کہ وہ قابض علاقوں میں اپنی پوزیشنز کو مضبوط کریں۔
اقوام متحدہ کی جانب سے صہیونی حکومت کے فوجیوں کو شام کے حالیہ قبضہ کیے گئے علاقوں سے فوری نکلنے کے مطالبے کے باوجود، اس حکومت کے وزیر جنگ نے فوجیوں کو حکم دیا ہے کہ وہ قابض علاقوں میں اپنی پوزیشنز کو مستحکم کریں۔
اتوار کے روز بشار الاسد کی حکومت کے خاتمے کے بعد، صہیونی حکومت کے فوجی جولان کی مقبوضہ پہاڑیوں سے آگے بڑھ کر ایک غیر فوجی علاقے میں داخل ہوگئے ہیں۔
جمعہ کے روز اسرائیل کے وزیر جنگ “اسرائیل کاٹز” نے کہا کہ انہوں نے فوج کو موسم سرما کے لیے تیار رہنے کا حکم دیا ہے اور “جبل الشیخ میں شام کے اندر مناسب سہولیات فراہم کرکے فوجیوں کے قیام کے لیے ضروری تیاری کرنے کی ہدایت کی ہے۔”
صہیونی حکومت کی توسیع پسندانہ اور قابضانہ کوششوں کی مصر سے لے کر قطر تک تمام عرب ممالک نے مذمت کی ہے۔
اقوام متحدہ کے سیکرٹری جنرل انٹونیو گوتریس نے بھی جمعرات کے روز “تمام فریقین سے غیر قانونی موجودگی کے تمام معاملات کو ختم کرنےکی اپیل کی ہے۔
صہیونی ریاست کے وزیر اعظم بنجمن نیتن یاہو نے جمعرات کے روز وائٹ ہاؤس کے قومی سلامتی کے مشیر جیک سلیوان سے کہا کہ اسرائیل اس وقت تک حائل علاقے میں موجود رہے گا جب تک کہ “1974 کے اسرائیل اور شام کے درمیان صلح معاہدے کو برقرار رکھنے کے لیے مؤثر قوتیں موجود نہ ہوں۔”
صہیونی ریاست اور شام 1948 سے رسمی طور پر جنگ کی حالت میں ہیں، اور صہیونی ریاست نے 1967 میں شام سے تعلق رکھنے والے جولان کی پہاڑیوں کے بڑے حصے پر قبضہ کر لیا تھا۔