قابض اسرائیلی فوج نے خاتون فلسطینی صحافی کو اغوا کر لیا

فاران: اسرائیلی قابض فوج نے مقبوضہ یروشلم میں ایک خاتون  صحافی کو بھی اغوا کر لیا ہے۔ صحافی خاتون لمی غوشہ کو مقبوضہ یروشلم میں ان کے گھر سے اغوا کیا گیا ہے۔

مقبوضہ یروشلم میں فلسطینی شہریوں کا اسرائیلی قابض فوج کے ہاتھوں بلا روک ٹوک  اغوا معمول بن چکا ہے۔  پچھلے ماہ اگست میں اس طرح اغوا کیے گئے فلسطینیوں کی تعداد 148 ہے۔ ان مغویان میں 30 نوعمر بچے اور سات فلسطینی خواتین بھی شامل ہیں۔

خاتون صحافی کے اغوا کے عینی شاہدین کے مطابق اتوار کے روز اسرائیلی قابض فوج نے پہلے ان کے گھر میں زبردستی داخل ہو کر گھر کی توڑ پھوڑ کی اور بعد ازاں انہیں ساتھ لے گئی۔ کہا جارہا ہے کہ انہیں ایک فوجی انٹیرو گیشن سنٹر لے جایا گیا ہے۔

فلسطینیوں کے خلاف اسرائیلی قابض فوج کے مظالم اور گھروں کی مسماری کو رپورٹ کرنے والے صحافی اسرائیلی قابض فوج کا ان دنوں اہم ہدف ہیں۔ فلسطینی نژاد امریکی صحافی شیریں ابو عاقلہ کا اسرائیلی قابض فوج کے ہاتھوں قتل بھی زیادہ پرانا نہیں ہوا ہے۔