اسرائیلی فوج: ہم غلط تھے، حماس کا اعلیٰ کمانڈر ہلاک نہیں ہوا

فاران: اسرائیلی فوج نے اعلان کیا ہے کہ شمالی غزہ میں “بیت حنون” بٹالین کے کمانڈر “حسین فیاض” کی شہادت سے متعلق اس کا گزشتہ آٹھ ماہ کا دعویٰ درست نہیں ہے۔
تسنیم بین الاقوامی خبر رساں ادارے کی رپورٹ کے مطابق ، جب کہ صیہونی حکومت نے حماس کے عسکری ونگ عزالدین قسام بٹالین میں بیت حنون بٹالین کے کمانڈر حسین فیاض (ابو حمزہ فیاض) کے قتل کا دعویٰ کیا تھا، انہیں گزشتہ روز شہداء کے اہل خانہ تسلی کو دیتے ہوئے دیکھا گیا۔

حماس کے اس سینیئر کمانڈر کی موجودگی کی ویڈیو سوشل نیٹ ورکس پر شائع ہونے کے بعد اب قابض اسرائیلی فوج نے ایک بیان میں اپنی غلطی تسلیم کرتے ہوئے کہا ہے کہ ’’بیت حنون میں حسین فیاض کے قتل سے متعلق سابقہ سیکیورٹی معلومات درست نہیں تھیں۔‘‘

اسرائیلی فوج نے تقریباً 8 ماہ قبل اس فلسطینی کمانڈر کے قتل کا دعویٰ کیا تھا۔

تاہم، حسین فیاض کی سوشل نیٹ ورکس پر شائع ہونے والی ایک ویڈیو میں حماس کا یہ کمانڈر جنگ کے بارے میں بات کرتا ہے اور اسرائیلی فوج کو پہنچنے والے نقصان اور غزہ کو فتح کرنے میں اس کی ناکامی کی طرف اشارہ کرتا ہے، اور اس بات پر زور دیتا ہے کہ قابض اپنے اعلان کردہ اہداف تک نہیں پہنچے اور یہ ان کی اسٹریٹجک ناکامی کو ظاہر کرتا ہے۔

فیاض کہتے ہیں: “آج ہم لڑائی میں مصروف ہیں اور جن لوگوں کو نقصان ہوا ان میں سے کچھ پوچھ سکتے ہیں: فتح کہاں ہے؟” انہوں نے کہا: “جنگوں کے مقاصد ہوتے ہیں، اور اگر کوئی مقصد حاصل نہیں کرتا تو وہ ناکام ہو جاتا ہے۔ فوجی اور سویلین قوانین کے مطابق، اگر کوئی طاقتور آدمی نہیں جیتتا تو وہ ہار جاتا ہے، اور اگر کمزور آدمی نہیں ہارتا، تو وہ جیت جاتا ہے۔”

فیاض بتاتے ہیں کہ “قابضین کو پتھروں اور لاشوں کے ٹکڑوں اور تباہی کے سوا کچھ حاصل نہیں ہوا ہے”۔ وہ اس بات پر زور دیتے ہیں کہ “غزہ اس جنگ سے سربلند اور فتحیاب ہوا ہے۔”

اس ویڈیو پر ردعمل ظاہر کرتے ہوئے اسرائیلی تجزیہ کار یا بیالکوف نے بیت حانون میں فیاض کی موجودگی کو اسرائیلی فوج کے لیے “شرمناک” قرار دیا، جس نے پہلے ان کے قتل کا اعلان کیا تھا۔

گزشتہ مئی میں، اسرائیلی فوج نے “جبالیہ کیمپ (غزہ کی پٹی کے شمال میں) میں بیت حنون بٹالین کے کمانڈر” حسین فیاض کو قتل کرنے کا دعویٰ کیا تھا۔