صنعا کے بین الاقوامی ہوائی اڈے سمیت کئی جگہوں پر امریکی حملے

فاران: جمعے کی صبح امریکی جنگی طیاروں نے صنعا کے بین الاقوامی ہوائی اڈے اور یمن کے چار صوبوں کے علاقوں پر دو بار بمباری کی۔

جمعے کی صبح امریکی جنگی طیاروں نے یمن پر حملوں کی ایک نئی لہر میں صنعاء کے بین الاقوامی ہوائی اڈے پر بمباری کی اور شمالی یمن کے صوبہ صعدہ کے الصفرا ضلع میں العصاید کے علاقے اور صعدہ کے ضلع آل سالم پر بھی پانچ بار حملے کیے گئے۔

حملوں کے اس دور میں امریکی جنگی طیاروں نے یمنی دارالحکومت کے مرکز میں واقع ضلع التحریر کے علاقے القیادہ اور ملک کے مغرب میں صوبہ الحدیدہ کے ضلع اللاحیہ پر تین بار بمباری کی۔

یمنی دارالحکومت پر ہونے والے حملے میں متعدد شہریوں کے گھروں کو نقصان پہنچا ہے تاہم ابھی تک علاقے کے رہائشیوں کے ممکنہ جانی نقصان کی کوئی رپورٹ جاری نہیں کی گئی ہے۔

جمعرات کی شب امریکی جنگی طیاروں نے صوبہ صنعا کے ضلع سنحان کے علاقے جربان پر چار بار بمباری کی۔

اس سے قبل امریکی جنگی طیاروں نے صنعا اور صعدہ صوبوں پر متعدد حملے کیے تھے۔ ان جنگی طیاروں نے صعدہ میں سحار کے علاقے پر بھی تین بار بمباری کی۔

امریکہ اور برطانیہ نے صیہونی حکومت کی حمایت میں 15 مارچ 2025 کو یمن کے خلاف فضائی حملے شروع کیے جس میں ملک کے رہائشی علاقوں اور شہری مراکز کو نشانہ بنایا گیا۔

یمن کی انصار اللہ تحریک کے سیاسی دفتر نے ایک بیان میں صنعا میں رہائشی محلوں پر امریکی اور برطانوی فضائی حملوں کو دشمنی اور مجرمانہ کارروائی قرار دیا ہے۔

اس سلسلے میں یمنی مسلح افواج نے بھی تاکید کی ہے کہ وہ امریکی جارحیت کا مقابلہ کرتے رہیں گے اور غزہ کی پٹی پر جارحیت مکمل طور پر بند ہونے اور علاقے کا محاصرہ ختم ہونے تک اسرائیلی بحری جہازوں کو گزرنے سے روکیں گے۔