غزہ میں اسرائیلی فوج کا نیا جرم کم از کم 5 شہید

فاران: اسرائیلی فوج نے آج (پیر) غزہ میں ایک فلسطینی اسکول کے احاطے میں پناہ گزینوں کے خیمے پر براہ راست حملہ کیا جس میں متعدد شہری شہید ہوگئے۔
فارس نیوز ایجنسی انٹرنیشنل گروپ؛ العربی ٹی وی نے غزہ میں اپنے نامہ نگار کے حوالے سے خبر دی ہے کہ یہ حملہ غزہ کی پٹی کے وسط میں واقع نصیرات کیمپ میں ہوا اور اس میں کم از کم پانچ فلسطینی شہری شہید ہوئے۔
نصیرات کیمپ کے العودہ اسپتال نے بھی ایک بیان میں اعلان کیا ہے کہ حملے کے بعد 18 دیگر شہری زخمی ہوئے ہیں جنہیں اس اسپتال میں منتقل کیا گیا ہے۔
اطلاعات کے مطابق یہ حملہ اقوام متحدہ کے زیر انتظام اسکول کے احاطے میں ہوا۔
غزہ کی وزارت صحت کی طرف سے شائع کردہ تازہ ترین اعدادوشمار کے مطابق گزشتہ ایک سال کے دوران اسرائیلی حملوں میں 50,082 فلسطینی ہلاک اور 113,000 سے زائد زخمی ہوئے ہیں۔
غزہ حکومت کے مطابق شائع شدہ اعدادوشمار میں صرف وہ شہداء شامل ہیں جن کی لاشیں ریسکیو فورسز ملبے سے نکالنے میں کامیاب ہوئیں اور سینکڑوں دیگر فلسطینی شہداء تاحال لاپتہ ہیں۔