غزہ کی پٹی میں 3 نئے قتل عام میں 31 فلسطینی شہید، 62 زخمی

فاران: فلسطینی وزارت صحت نے اعلان کیا کہ اسرائیلی قابض فوج نے غزہ کی پٹی میں 3 تازہ قتل عام کیے جن میں مزید درجنوں افراد شہید اور زخمی ہوئے۔

وزارت صحت نے ہفتے کے روز ایک بیان میں وضاحت کی کہ قابض فوج نے غزہ کی پٹی میں خاندانوں کے خلاف تین قتل عام کیے جس کے نتیجے میں 24 گھنٹوں کے اندر مزید 31 فلسطینی شہید اور 62 زخمی ہوئے۔

وزارت صحت نے بتایا کہ گذشتہ سال 7 اکتوبر کو غزہ پر اسرائیلی نسل کشی کی جنگ شروع ہونے کے بعد سے اب تک 39,550 شہید اور 91,280 زخمی ہو چکے ہیں۔

خیال رہے کہ گذشتہ 7 اکتوبر سے “اسرائیلی” قابض افواج غزہ کی پٹی پر تباہ کن جنگ کیے ہوئے ہے جس کے نتیجے میں دسیوں ہزار معصوم شہری شہید، زخمی اور لاپتہ ہونے کے علاوہ 20 لاکھ افراد بے گھرہوچکے ہیں۔ بنیادی ڈھانچے کا 70 فیصد سے زیادہ تباہ ہوچکا ہے اور غزہ کی سخت ناکہ بندی اور مسلسل جنگ کے نتیجے میں گنجان آباد علاقہ قحط کی لپیٹ میں ہے۔

ادویات، پانی اور خوراک کی قلت کے باعث آئے روز بچوں اور دیگرشہریوں کی اموات کی خبریں آ رہی ہیں۔ دوسری جانب غاصب صہیونی دشمن ریاست نے جنگ بندی کی تمام کوششیں ناکام بنا دی ہیں اور وہ غزہ میں فلسطینیوں کی منظم اور مسلسل نسل کشی پر پوری ڈھٹائی کے ساتھ قائم ہے۔