پاکستان نے اسرائیل کو جنگی مجرم ریاست قرار دیا، حماس کا خیرمقدم

فاران: اسلامی تحریک مزاحمت ’حماس‘ نے حکومت پاکستان کے اس اقدام کا خیرمقدم کیا ہے جس میں اس نےنام نہاد قابض اسرائیلی ریاست کو ’جنگی مجرم‘ اور مجرم صہیونی فاشسٹ وزیراعظم بنجمن نیتن یاھو کو ’دہشت گرد‘ شخص قرار دیا ہے۔

حماس کا کہنا ہے کہ وہ حکومت پاکستان کےاس اعلان کودہشت گرد صہیونیوں کے ہاتھوں نہتے فلسطینی عوام کی نسل کشی اور نسلی تطہیر کی جنگ کا نشانہ بننےوالوں کی حمایت کی طرف اہم قدم تصور کرتے ہوئےاس کا خیر مقدم کرتی ہے۔

پاکستان کا یہ اعلان حکومت پاکستان، پاکستانی جماعتوں اور عوام کی طرف سے فلسطینیوں کے نصب العین اور عالم اسلام کے اولین حل طلب مسئلے کی حمایت پر مبنی اصولی، تاریخی اور دیرینہ موقف کی عکاسی کرتا ہے۔

حماس نے عالم اسلام سے مطالبہ کیا کہ وہ فاشسٹ قابض ریاست کو عالمی سطح پر تنہا کرنے کے لیے اس کا ہر سطح پر بائیکاٹ کریں۔ بیان میں مسلمان ممالک کی حکومتوں سے پرزور مطالبہ کیا گیا کہ وہ صہیونی بربریت اور نسل کشی کا شکار فلسطینی عوام کی حمایت اور انہیں ریلیف فراہم کرنے کے لیے ہرممکن کوشش کریں۔

غزہ میں جاری اسرائیلی جنگی جرائم اور نسل کشی کی جنگ کو روکنے کے لیے اقوام متحدہ اور سلامتی کونسل کی قراردادوں پر عمل درآمد یقینی بنانے اور جنگ بندی کی حالیہ قرارداد پرعمل درآمد کرانے کے لیے اسرائیل پر دباؤ ڈالیں۔ حماس نے زور دے کر کہا کہ عالم اسلام کو چاہیے کہ وہ فلسطینی عوام کے حقوق کی نصرت میں موثر اقدامات کرے، مسجد اقصیٰ اور فلسطین بھر میں موجود تمام مسیحی اور مسلم مقدسات کی حفاظت کے لیے موثر کردار ادا کرے۔