10 دنوں میں اسرائیل کے خلاف 13 یمنی کارروائیاں

فاران: یمن کی مسلح افواج نے اعلان کیا ہے کہ انہوں نے گزشتہ 10 دنوں میں اسرائیلی حکومت کے خلاف 13 فوجی کارروائیاں کی ہیں۔
العالم کی رپورٹ کے مطابق، یمنی مسلح افواج کے ترجمان بریگیڈیئر جنرل یحیی سریع نے اتوار کی شب اعلان کیا کہ یمنی افواج نے غزہ کی فوجی مدد کے سلسلے میں گذشتہ 10 دنوں میں اسرائیل کے خلاف 13 فوجی کارروائیاں کی ہیں۔

الجزیرہ کے مطابق یمنی مسلح افواج کے ترجمان نے ایک رپورٹ میں آپریشن کی تفصیلات کا اعلان کرتے ہوئے کہا کہ زیادہ تر حملوں میں وسطی اسرائیل میں تل ابیب کے علاقے کو نشانہ بنایا گیا۔

انہوں نے کہا: “یہ حملے 19 دسمبر سے 30 دسمبر تک کیے گئے، بنیادی طور پر ہائپرسونک بیلسٹک میزائلوں کا استعمال کیا گیا۔

یمن کی مسلح افواج نے ہفتے کے روز یہ بھی اعلان کیا تھا کہ انہوں نے جنوبی اسرائیل میں نیگیو کے علاقے میں واقع نواتیم ایئر بیس کو “فلسطین 2” ہائپرسونک بیلسٹک میزائل سے نشانہ بنایا اور یہ حملہ کامیاب رہا۔

رپورٹ کے مطابق یمن کی مسلح افواج کے ترجمان بریگیڈیئر جنرل یحیی سریع نے بھی ہفتے کی شب ایک بیان میں کہا کہ “یمنی مسلح افواج کے فضائی دفاع نے ایک امریکی ایم کیو-9 یو اے وی کو مار گرایا جو صوبہ البیضا کے آسمان میں دشمن کے مشن پر تھا۔ یہ کارروائی مقامی طور پر بنائے گئے زمین سے فضا میں مار کرنے والے میزائل کا استعمال کرتے ہوئے کی گئی۔

یمن نے اعلان کیا ہے کہ وہ غزہ کے عوام کی حمایت میں اپنے مذہبی، اخلاقی اور انسانی فرائض جاری رکھے گا اور غزہ کی جنگ بند ہونے اور محاصرہ ختم ہونے تک صیہونی دشمن کے خلاف فوجی کارروائیاں جاری رکھے گا۔