غزہ میں فلسطینیوں کا ہولوکاسٹ جاری، مزید 104 شہید، 162 زخمی

فاران: قابض اسرائیلی فوج نے نسل کشی کے آغاز کے بعد سے مسلسل 166ویں روز بھی غزہ کی پٹی میں شہریوں کے قتل عام کا سلسلہ جاری رکھا جس میں گزشتہ 24 گھنٹوں کے دوران 100 سے زائد شہید ہو گئے۔

فلسطینی وزارت صحت نے بدھ کے روز ایک بیان میں کہا ہے کہ اسرائیلی قابض فوج نے غزہ کی پٹی میں گزشتہ 24 گھنٹوں کے دوران 10 خاندانوں کا قتل عام کیا جس کے نتیجے میں سینکڑوں افراد جاں بحق اور زخمی ہوئے جن میں سے 104 شہید اور 162 زخمیوں کو ہسپتالوں میں منتقل کیا گیا۔

وزارت صحت نے مزید کہا کہ متعدد شہداء اور زخمی اب بھی ملبے کے نیچے اور سڑکوں پر ہیں اور ایمبولینس اور شہری دفاع کا عملہ ان تک نہیں پہنچ سکتا۔

اس طرح گذشتہ 7 اکتوبر سے اب تک اسرائیلی جارحیت میں 31,923 شہید اور 74,096 زخمی ہوئے ہیں۔