غزہ جنگ کا 432 واں دن: شمالی غزہ میں ایک گھر پر بمباری میں 22 فلسطینی ہلاک

فاران: غزہ جنگ کے 432 ویں روز بھی صیہونی حکومت کی فوج نے غزہ کی پٹی کے مختلف علاقوں پر بمباری جاری رکھی جس کے نتیجے میں روزانہ درجنوں فلسطینی شہید ہوئے اور صیہونی حکومت کے تازہ ترین جرم میں شمالی غزہ پٹی میں ایک گھر پر بمباری کے نتیجے میں 22 افراد شہید ہوگئے۔

العالم کی رپورٹ کے مطابق طبی ذرائع نے بتایا ہے کہ شمالی غزہ کی پٹی میں کمال عدوان اسپتال کے قریب ایک گھر پر بمباری میں شہید ہونے والوں کی تعداد 22 ہوگئی ہے۔

فلسطینی میڈیا کے مطابق حملے میں بڑی تعداد میں فلسطینی زخمی بھی ہوئے ہیں۔

غزہ کی وزارت صحت نے منگل کے روز اعلان کیا ہے کہ 7 اکتوبر 2023 کو جنگ کے آغاز سے اب تک صیہونی حکومت کے جارحانہ حملوں میں شہید ہونے والوں کی تعداد 44,786 تک پہنچ گئی ہے اور 106188 زخمی ہوئے ہیں۔

غزہ میں نسل کشی کے باوجود دنیا اب بھی صیہونی حکومت کی جانب سے جنگ بندی قبول کرنے کا انتظار کر رہی ہے۔ دریں اثنا موساد کے سربراہ ڈیوڈ بارنیا کی سربراہی میں صیہونی حکومت کا ایک اعلیٰ سطحی سکیورٹی وفد منگل کے روز مصر کے دارالحکومت قاہرہ گیا جہاں غزہ میں جنگ بندی اور قیدیوں کے تبادلے کے معاہدے پر تبادلہ خیال کیا گیا۔

العربیہ الجدید کے ذرائع کے مطابق، برنیا کے علاوہ، شین بیت کے چیئرمین رونن بار، ان کے نائب اور اسرائیلی قابض فوج کے چیف آف اسٹاف ہرزی ہلوی بھی وفد میں موجود تھے، جنہوں نے حماس کے ساتھ بالواسطہ معاہدے کے پہلے مرحلے میں رہائی پانے والوں کے ناموں پر تبادلہ خیال کیا۔

دریں اثناء قطرکی وزارت خارجہ کے ترجمان ماجد الانصاری نے اس بات پر زور دیا ہے کہ ان کے ملک نے غزہ میں جنگ بندی کے معاہدے کو حتمی شکل دینے کے مقصد سے مذاکرات کے فریم ورک کے اندر حماس اور اسرائیل سے ایک بار پھر نیک نیتی سے رابطہ کیا ہے۔