فاران: منگل کی صبح صیہونی حکومت نے ایک بار پھر غزہ کی پٹی پر بڑے پیمانے پر حملے دوبارہ شروع کرتے ہوئے محصور پٹی کے مختلف علاقوں کو نشانہ بنایا جس کے نتیجے میں بچوں، خواتین اور بے گھر افراد سمیت متعدد شہری شہید اور زخمی ہوئے۔
یہ حملے اس حقیقت کے باوجود جاری ہیں کہ مارچ کے آغاز سے ہی غزہ کی پٹی شدید محاصرے میں ہے اور خوراک اور طبی امداد کا داخلہ تقریبا مکمل طور پر تباہ ہوچکا ہے اور اسرائیلی جنگی طیاروں نے گزشتہ چند گھنٹوں میں غزہ پٹی کے شمالی، وسطی اور جنوبی علاقوں کو نشانہ بنایا ہے۔
دریں اثنا العربیہ الجدید نیوز ذرائع نے بتایا کہ حماس تحریک کا ایک اعلیٰ سطحی وفد قاہرہ کا دورہ کرے گا تاکہ مصری حکام کے ساتھ ممکنہ جنگ بندی، قیدیوں کے تبادلے کے منصوبے اور فتح کے ساتھ داخلی مصالحتی مذاکرات پر تبادلہ خیال کیا جاسکے۔ یہ دورہ جبریل الرجوب کی سربراہی میں فتح کے وفد کی مصری حکام کے ساتھ حالیہ ملاقات کے بعد ہو رہا ہے۔
اسرائیلی حکومت کی جانب سے شمالی رفح، بیت لہیا اور غزہ شہر کے مغرب میں واقع علاقوں بشمول السفینہ، الکرمہ اور انٹیلی جنس ٹاورز پر فضائی حملوں کے نتیجے میں درجنوں فلسطینی شہید ہوئے۔
دیر البلاح میں ایک رہائشی مکان پر ہونے والے بم دھماکے میں پانچ بچوں سمیت کم از کم نو افراد شہید ہو گئے۔
دوسری جانب خان یونس میں ناصر ہسپتال کے قریب ایک خیمے میں آگ لگنے سے فلسطینی صحافی احمد منصور شدید جھلس کر جاں بحق ہوگئے۔
اقوام متحدہ کے سیکرٹری جنرل کے ترجمان اسٹیفن دوجارک نے اعلان کیا ہے کہ اقوام متحدہ کے متعدد سینئر عہدیداروں نے عالمی رہنماؤں پر زور دیا ہے کہ وہ غزہ کے عوام کی زندگیاں بچانے کے لیے فوری اقدامات کریں۔
غزہ میں صحت کے بحران کی بھی اطلاعات ہیں، خاص طور پر ان علاقوں میں جہاں لوگ سیوریج تالابوں کے قریب آباد ہیں، جہاں کیڑوں، مچھروں اور چوہوں کی موجودگی کی وجہ سے بیماریوں کے پھیلاؤ میں اضافہ ہوا ہے، جس سے نوزائیدہ بچوں اور بچوں کی صحت خطرے میں پڑ گئی ہے۔
مصنف : ترجمہ جعفری ماخذ : فاران خصوصی
تبصرہ کریں