غزہ میں اسرائیلی بربریت مسلسل جاری، شہداء کی تعداد 21672 ہوگئی

فاران: غزہ کی وزارت صحت نے ہفتہ کے روز اعلان کیا ہے کہ 7 اکتوبر سے مسلسل غزہ پر جاری اسرائیلی بمباری کے نتیجے میں اب تک شہداء اور زخمیوں کی تعداد بالترتیب 21672 اور 56165 ہوگئی ہے۔ ان شہداء میں بڑی تعداد فلسطینی خواتین اور فلسطینی بچوں کی ہے۔ جبکہ 312 ہیلتھ کیئر ورکرز بھی شہداء میں شامل ہیں۔

وزارت صحت کے اس تازہ اعلان کے مطابق شہداء کی بہت بڑی تعداد کا تعق عام شہریوں سے ہے۔ علاوہ ازیں اسرائیلی فوج نے غزہ پر زمینی حملوں کے دوران جن فلسطینیوں کو گرفتار کیا ہے، ان میں 99 شہری غزہ کے ہسپتالوں میں کام کرنے والے ہیلتھ ورکرز ہیں۔

شہید ہونے والوں میں 70 فی صد خواتین اور بچے شامل ہیں۔ جب کہ ہزاروں کی تعداد میں شہری ملبے تلے دبے ہوئے ہیں یا لاپتا ہیں۔

وزارت صحت کےترجمان اشرف القدرہ نے بتایا کہ صحت کے نظام کے خلاف اسرائیلی خلاف ورزیوں کے نتیجے میں 312 صحت کے اہلکاروں کی شہادت ہوئی۔ اس کے علاوہ قابض فوج شمالی غزہ میں ہسپتال کے ڈائریکٹرز کی قیادت میں 99 صحت کے اہلکاروں کو گرفتار کر رہا ہے۔

القدرہ نے تصدیق کی کہ اسرائیلی قابض فوج نے جان بوجھ کر 142 صحت کے اداروں کو نشانہ بنایا، 23 ہسپتالوں اور 53 صحت کے مراکز کو سروس سے محروم کر دیا، اس کے علاوہ 104 ایمبولینسوں کو تباہ کر کے انہیں سروس سے باہر کر دیا۔

انہوں نے ان شہریوں کی شہادتوں کا حوالہ دیا جنہیں حال ہی میں حراستی مراکز سے رہا کیا گیا تھا انہوں نے کہا کہ زیر حراست افراد خاص طور پر طبی عملے کو شدید جسمانی اور نفسیاتی تشدد، بھوک، پیاس، نیند کی کمی اور مسلسل پوچھ گچھ کا نشانہ بنایا گیا۔