چار فلسطینیوں کی شہادت کے بعد غرب اردن میں احتجاجی مظاہرے پھوٹ پڑے

فاران: کل بدھ کے روز فلسطین کے مقبوضہ مغربی کنارے کے شمالی شہر جنین میں اسرائیلی فوج کی دہشت گردی میں چار فلسطینی نوجوانوں کی شہادت کے واقعے کے خلاف کئی شہروں میں مظاہرے شروع ہو گئے ہیں۔ غرب اردن میں ہونے والے مظاہروں میں قابض فوج اور فلسطینی شہریوں کے درمیان جھڑپوں کی بھی اطلاعات ہیں۔

قابض افواج اور فلسطینی شہریوں کے درمیان چوکیوں اور بائی پاس سڑکوں پر جھڑپیں ہوئیں۔ جنین میں چار فلسطینیوں کی شہادت کے واقعے کی خبر سنتے ہی کئی شہروں میں قابض فوج کے خلاف احتجاجی مظاہرے شروع ہوئے گئے تھے۔

غرب اردن میں ہونے والے مظاہروں کے دوران 34 شہری زخمی ہوئے۔ ان میں سے بیشتر نابلس شہر میں اسرائیلی فوج کے ساتھ جھڑپوں میں زخمی ہوئے۔

کئی مقامات پر یہودی آبادکاروں اور فلسطینی شہریوں کے درمیان جھڑپیں بھی ہوئیں۔

ہلال احمر کے عملے نے بتایا کہ ان کی ٹیموں نے نابلس میں دیر شرف اور حوارہ کے مقامات پر تصادم میں 34 زخمیوں کو طبی امداد فراہم کی ہے۔

انہوں نے بتایا کہ دیر شرف میں دھاتی گولیاں لگنے سے کئی فلسطینی زخمی ہوئے جب کی 13 فلسطینی آنسوگیس کی شیلنگ سے زخمی ہوئے۔

مقامی ذرائع نے بتایا کہ نابلس کے گاؤں ماداما میں آباد کاروں کے تشدد سے 8 شہری زخمی ہوئے۔

قابض افواج نے مقبوضہ مغربی کنارے اور القدس میں 199 بستیاں اور 220 چوکیاں قائم کر رکھی ہیں جن میں 913,000 سے زائد آباد کار رہتے ہیں، جن میں 350 ہزار مقبوضہ مشرقی بیت المقدس میں شامل ہیں، جو مقبوضہ فلسطینی علاقوں میں تقریباً روزانہ حملے کرتے ہیں۔

قلقیلیہ میں، کراسنگ ایریا میں جھڑپوں میں 14 شہری زخمی ہوئے۔

بدھ کی شام البیرہ شہر کے شمالی داخلی دروازے پر اسرائیلی قابض فوج کے ساتھ ہونے والی جھڑپوں کے دوران ایک نوجوان شدید زخمی ہوا۔

وزارت صحت نے کہا: البیرہ کے شمالی دروازے پر تصادم کے مقام سے براہ راست گولیوں سے زخمی ہونے والے ایک شخص کو تشویشناک حالت میں آپریٹنگ روم میں داخل کیا گیا تھا۔

اس کے علاوہ صیہونی قابض فوج نے بدھ کے روز الخلیل شہر کے جنوبی علاقے سے دو بچوں کو گرفتار کر لیا۔

وفا ایجنسی کے مطابق، قابض فوجیوں نے دو بچوں کوجن کی شناخت ابھی تک معلوم نہیں ہو سکی الخلیل کے جنوب میں کارنٹینا گول چکر کے قریب سے روکاجس کے بعد انہیں فوجی گاڑی میں ڈال کرنامعلوم مقام پر منتقل کردیا گیا۔